Eibarko Udal Euskaltegia

2011-06-17T05:11:00.000-07:00

BIKINI OPERAZIOA

Udaren atarian gaude eta mitxelinak ezkutatzeko garaia da. Gehienok badugu kilotxo batzuk kentzeko formula magikoa. Zuk zein erabiltzen duzu? Idatz ezazu ea denon artean helburua lortzen dugun!!!!!!!!!!!!

2011-06-03T04:11:00.000-07:00

UDAN ERE EUSKARAZ

Urtero bezala, Eibarko Udal euskaltegiak udarako eskaintza kaleratu du. Irakurri eta animatu ! Udan ere euskaraz gozatu!

Hauxe da gure eskaintza:
· Euskalduntze eta alfabetatzea 1., 2. ETA 3. maila (EGA) prestatzeko ikastaroak (titulu ofizialak).
· Goizez, 4 orduko ikastaroak
· Ekainaren 27tik uztailaren 22ra eta irailean jarraitzeko aukera (azterketa aurreko egunetan, egunean 2 ordu)
Matrikulatzeko epea : ekainaren 1etik 17ra
Bekak eta diru-laguntzak ditugu
Etorri eta galdetu!
(16 urtetik gorakoentzat)

2011-05-27T03:26:00.000-07:00

Aurtengo udan zer?

Urtean zehar telebistan kirol emanaldiek ordu asko eta asko betetzen dute, futbola dela, sakibaloia dela, pilota dela... Baina aurtengo udan, agian, ikusi beharrean, egiten hasi beharko dugu; izan ere, badirudi ez dugula aparteko kirol txapelketarik izango ,ez olinpiadarik, ez futbolik ... Beraz, zerbait asmatu beharko dugu.

Esango al diguzu zuk zertan emango duzun denbora?

2011-05-23T05:27:00.000-07:00

DAGOENEKO ATZEAN UTZI DITUGU DITXOSOZKO HAUTESKUNDEAK, ALA EZ?

Hauteskundeak igaro ondoren balorazioak egiteko unea dugu. Zer iruditu zaizkizu emaitzak? Zer eskatuko zenioke aukeratu berri den udalbatzari datozen lau urteetarako? Aldaketarik espero duzu? Zeintzuk dira Eibarrek dituen premia edo behar nagusiak?

2011-05-16T03:00:00.000-07:00

kaixo ikasleok!

Aste honetan, zuetako batzuk azterketak egiten aritu zarete; badakizue emaitzak ekainaren 10ean jarriko dituztela. Zorte on!

Gehienok egunero etortzen zarete fin-fin euskaltegira, baina beste bide batzuk ere badira euskara ikasteko. Batez ere, inguruan euskaraz hitz egiteko aukera handirik ez duzuenontzat. Horren haritik, eta udara begira, hemen duzue uztail, abuztu eta iraileko barnetegien eskaintza.

Aukera polita izan daiteke urte osoan ikasitakoa erabiltzeko eta ikas-prozesuan aurrera egiteko. Bidez batez, ondo pasatzeko modua da eta ziur gaude gustatuko zaizuela. Anima zaitezte!

Bukatzeko, eta egun hauetako tentsioa pixka bat baretzeko, hona hemen bideo polit bat:

2011-04-15T05:28:00.001-07:00

EIBAR ETA ERREPUBLIKA

Eibarren eta Errepublikaren arteko lotura estua izan da. Zer dela eta hainbesterainoko harremana? Hurrengo lerroetan argitasun apur bat ematen saiatuko naiz.

1931ko apirilaren 14an, goizaldean, Eibar II. Errepublika aldarrikatzen esnatu zen; aurrena izan zen estatu osoan. Bartzelonan Errepublika aldarrikatu zela jakin zutenean, eibartar guztiak plazan batu, Alfonso XIII izena handik kendu, eta Plaza de la República izena jarri zioten. Geroago, Errepublika aldarrikatu zuen lehenengo herria izateagatik, Hiri Eredugarri titulua jaso zuen Eibarrek.

Baina, Errepublika aldarrikatu baino lehen, gure herriaren egoera nolakoa zen?

Alfonso XIII zen Espainiako erregea. Herriak ez zuen batere estimatzen, izan ere, hainbat ustelkeria-delitutan nahastuta zegoen, Marokoko Gerran partaide zen, eta Miguel Primo de Riveraren alde zegoen. Azken honek, estatu-kolpea eman ondoren, boterea lortu zuen, 1923 eta 1930 artean. Horrela, hurrengo udal-hauteskundeek garrantzi handia zeukaten. Apirilaren 12an izan ziren eta erregimen politikoarentzat azterketa bat izan ziren.

Eibarrek, momentu hartan, 13.541 biztanle zituen. Herri sozialista zen eta hori nabarmen geratu zen hauteskundeetan. Udaleko zinegotziak 19 ziren eta hauteskundeen emaitzak hauek izan ziren: 18 zinegotzi, Errepublikazale-sozialisten koaliziorako eta19.a EAJrako. Horrela, Alfonso XIII.aren garaian, azken alkatea Timoteo Zubieta izan zen eta, hauteskunde haiek egin ondoren, lehenengo alkatea Errepublikarekin Alejandro Tellería, alkate txikia goitizenduna, izan zen.

Inork ez daki ondo zer gertatu zen 1931ko apirilaren 14an, egunsentian, Eibarren. Baina, II Errepublika aldarrikatu zuen lehenengo herria Eibar izan zen estatu osoan. Toribio Etxebarriak esaten du garraiolari batzuek, txantxetan, Errepublika ordurako leku guztietan gauzatuta zegoela esan zutela. Beste batzuek esaten dute gaizkiulertu bat izan zela.

Momentu hartan Juan de los Toyos zen alkateordea. Hark agindu bat jaso zuen. Agindu hartan esaten zen herria prest egon behar zela Errepublikarako. Baina berak ulertu zuen herriak Errepublika aldarrikatu egin behar zuela. Hori dela eta, eibartarrek 1931ko apirilaren 14an, goizeko 6etan, II Errepublika aldarrikatu zuten. Udaletxean, zinegotzi gazteenak, Mateo Careagak, hiru koloreko bandera altxatu zuen. Hura gertatu ondoren, kanpotik zetozen berriek ez zioten Errepublika aldarrikatuta zegoela eta eibartarrak urduri jarri ziren. Baina arratsalderako, Errepublika beste leku batzuetan ere aldarrikatuta zegoen. Beraz, bostetan herria plazan bildu zen, lehen esan bezala, eta han zegoen plaka - Alfonso XIII plaza izenarekin - kendu eta beste plaka bat jarri zuten, Errepublika plaza izenarekin. Esan beharra dago, jendearen irrika norainoko zen ulertzeko, plaka kartoiz eginda zegoela.

Gero, maiatzaren 3an, Indalecio Prieto, Miguel de Unamuno eta Queipo de Llano jenerala Eibarrera etorri ziren ofizialki herria Hiri Eredugarri izendatzeko.

Jaione Pinto

2011-04-15T05:28:00.000-07:00

2011-04-08T04:03:00.000-07:00

E-zaborra

Zer egiten duzu hondatzen zaizun telefono mugikorrarekin? Ibili, bai, baina "modatik pasatutako" horrekin? Ordenagailuarekin? Eta beste hainbeste tresnarekin?

Ba al dakizu zer/norako bidea hartzen duten behin zure begi-bistatik desagertutakoan?

Gure ekologia kontzientziak duen bide luzea hurbilen dagoen garbigunean amaitzen da. Hortik gerokoa jakin nahi baduzu, hemen klikatu eta ...

http://www.argia.com/argia-astekaria/2272/e-zaborra

2011-04-01T04:27:00.000-07:00

APIRILEAN, EURIA EZ EZIK, BONBAK ERE JAUSI DIRA Aste honetan bertan gogoratu dugu Durango bonbardatu zuteneko hura. Irudi latzak ikusi ditugu Gerediaga Elkarteak eskainita. Durango txikitu egin zuten eta Eibarrekin ere beste horrenbeste egin zuten. 1937ko udaberrian gertatu ziren haiek; urte batzuk igaro dira, baina ez da komeni erabat ahaztea sarraski haiek. Horregatik, hemen jarriko dugu Eibarko Udal Euskaltegiko ikasle batek bonbardaketa haietaz idatzitakoa. EIBAR ETA INGURUAK GERRA ZIBILEAN

1931ko apirilaren 12ko udal-hauteskundeak izan eta gero, Espainia Errepublika bihurtu zen, eta Eibar izan zen hura aldarrikatu zuen lehenengo hiria; Sahagun eta Jaka izan ziren hurrengoak.

Bost urte geroago, 1936an, armadaren fakzio bat matxinatu egin zen Errepublikaren aurka; errebolta hartan alderdi eskuindarren babesa izan zuen armadak. Horren ondorioz hasi zen Espainiako Gerra Zibila, eta Euskadiko eta Nafarroako lurraldeak zatituta geratu ziren bi aldetan: Araba eta Nafarroa, monarkikoen alde eta Gipuzkoa eta Bizkaia, legezko Errepublikaren alde.

Matxinadaren lehen astean, Nafarroan mugimendu militarrak hasi ziren eta zortzi zutabe sortu ziren falangistez, armada erregularreko lagunez eta, batez ere, erreketez osatuak. Zutabe haiek Emilio Molaren, Iparraldeko armadaren buruaren zuzendaritzapean Gipuzkoara abiatu ziren, bidean herriak beren kontrolpean hartuz; aldi berean, Gipuzkoako karlista askok bat egin zuten Nafarroakoekin.

Abuztuan, haietako hiru zutabe Irunerantz abiatu ziren, muga-postuak kontrolatzeko asmoz; horrela Errepublika isolatu nahi zuten eta haren komunikazioak eta horniketa-bideak moztu. Irailaren 5ean hartu zuten Irun, eta Frantziarekin muga moztu egin zuten; errepublikazaleek atzera egin zutenean hiria sutan utzi zuten. Nafarroatik abiatutako beste bost zutabeek Donostia hartu zuten irailaren 13an, erresistentziarik izan gabe –hiria aurreko egunean hustua izan zen–. Ondoren, soldadu karlistak berriro batu ziren eta Bizkairantz abiatu ziren.

Irailaren 29an, soldadu karlistek Gipuzkoako mendebaldeko frontea erasotu zuten, baina Errepublikarekiko leial ziren miliziek eutsi egin zieten haien posizioei. Urriaren 12an, Mola jeneralak aurrera egiteari uzteko agindua eman zuen, eta, horrela, frontea egonkortu egin zen.

Hartara, Gipuzkoako lurralde gehiena inbaditzaileen eskuetan zegoen, baina erresistentzia guneek tinko eusten zioten defentsari. Gerraren frontea Gipuzkoaren eta Bizkaiaren arteko mugan kistatuta zegoen, Intxorta mendietatik Udalaitzeraino (Besaide eta Saibi mendiak barne). Kalamua eta Akondia mendiak –Eibarren eta Markinan, hurrenez hurren– errepublikazaleen menpe zeuden; Karakate mendia, Elgoibar eta Soraluze, aldiz, matxinatuen kontrolpean, Deba bailararen gehiengoa bezala.

Frontearen defentsa Errepublikaren aldeko hainbat talderen ardurapean zegoen: Intxorta mendietan, EAJren gudariak; Kalamuako frontean, Eibarko PSOEren milizianoak; Udalaitzen, CNTren sindikalistak; Kanpazar mendatean Hermanos Proletarios-ak zeuden… Antolaketa nahasi haren aurrean, armada profesionalizatua zegoen.

Neguan zehar, Molaren soldaduak Eibar inguruko frontea hausten saiatu ziren behin baino gehiagotan. Elgetatik aurrera eginez Intxortetako defendatzaileen posizioak erasotzen zituzten, Camino de los Toldos izeneko bidea erabilita, baina saiakera guztiek porrot egin zuten. Egunez, hegazkinen laguntzarekin, erasotzaileek Intxortetako posizioak hartzen zituzten bezala, gauez, miliziar errepublikazaleek berreskuratu egiten zituzten.

1937ko udaberrian, Euskadi osoa menderatzeko nahia berpiztu zitzaien Frankori eta Emilio Molari; Madrilen uste zuten baino erresistentzia handiagoa topatu eta gero hiriburua menderatzeko asmoa bertan behera utzi eta, horren ordez, Bizkaia eta Gipuzkoa gogor erasotzea erabaki zuten. Horretarako, aginpean izango zituzten Nafarroako lau errekete brigada; brigada bakoitza 10 batailoiez eta bi artilleria taldez osatuta –6.000 lagun baino gehiago brigadako–. Horretaz gain, alemaniarren Kondor Legioa hegazkin eskuadrillaren laguntzarekin, airean ere bermatu zuten bere nagusitasuna.

Aurrera egiteko, honako errepide hauek erabiliko zituzten: Donostia-Bergara-Durango-Bilbao, Vitoria-Villarreal-Barazar-Bilbao eta Burgos-Orduña-Bilbao.

Horrela, martxoaren amaieran hasi zen erabateko erasoaldia; Murumendiren eta Albertiaren arteko frontea zatitu ondoren, Kanpazar eta Elgeta zuten helburu. Hilaren azken egunean, Soria eta Logroñotik etorritako 13 hegazkin italiarrek (lau Savoia-84 eta bederatzi Fiat CR-32) Elorrio eta Durango bonbardatu zituzten goizean eta arratsaldean. Elorrion, gutxienez, 7 lagun hil zituzten; Durangon, 336. Armadak Bizkaia aldeko frontea erasotzen jarraitu zuen: martxoaren 31tik apirilaren 4ra bitartean Otxandio bezala, hilaren erdian Saibigain mendia izan zen bataila-eremua.

Apirilaren 20an ekin zioten Mola jeneralaren soldaduek Intxortetan babestutako defendatzaileen aurkako erasoaldiari. Horretarako, 32 batailoiez baliatu ziren –errepublikazaleek sei baino ez zituzten–. Eguerdian, lurreko artileria-piezen tiroekin batera, airetik bonbardatzen eta metrailatzen hasi ziren errepublikazaleen posizioak. Horrela, 23an, erasoaldia hasi eta hiru egun geroago, matxinatuek Udalaitz hartu zuten, eta, hurrengo egunean, arratsaldeko bostetan Elgeta menperatzea lortu zuten.

23tik 26ra bitartean, eta, batez ere, Elgeta konkistatu eta gero, Aviazione Legionaria italiarrak, Kondor Legioa alemaniarren laguntza logistikoarekin, Eibar eta inguruak bonbardatu zituzten eragozpenik izan gabe. Hegazkin italiarrak Soriatik eta Logroñotik abiatu ziren Euskadira, Ferdinando Raffaelli Aviazione Legionariaren koronelaren eta Igino Mencarelli Escuadra 24aren buruaren aginpean.

Airetiko erasoaldia 23ko eguerdiko hamabietan hasi zen Ilordon, Azkonabitzan eta Elgetan. Geroago, Eibar izan zen itua: Romeo RO-37 Bis eta Savoia Marchetti S.79 hegazkinek hiri gainetik egin zuten hegan eta beren bonba karga askatu zuten. Lekurik kaltetuenak Barrenkale, Matxaria eta Orbea lantegia izan ziren.

Apirilaren 24an, egunsentian, Eibarko defendatzaileei hiritik alde egiteko agindua eman zieten. Biztanle asko, orduraino, hiritik joanak ziren Deustuko, Lutxanako eta Gernikako arma lantegietan lan egitera. Eta bonbardaketen jazoera larriena egun hartan gertatu zen, hain zuzen ere: arratsaldeko seiak aldera, tamaina handiko bonba bat erori zen Astaburuaga lantegiaren ondoan, O’Donell kalean -gaur egun Ego-Gain-, eta han zegoen babeslekua jo zuen bete-betean. 60 bat lagun hil ziren, milizianoak eta zibilak.

Bonbardaketak 25ean amaitu zirenean hiriko gune asko sutan zeuden, hegazkinek bonba leherkorrekin batera, bonba su-eragileak erabili zituzten eta. Hiru egun horietan, guztira 74 lagun hil ziren eta 97 zaurituta gertatu ziren. Eibarren nahasmendua zen nagusi, eta Mola jeneralaren infanteria iristear zegoen. Artean hiriko defentsari eutsita geratzen ziren azken miliziarrek ihes egin zuten: Untzaga plazan zeuden posizio abantailatsuak –eta baita Urki auzokoak ere– bertan behera utzita Urkora igo ziren, handik Gernikara abiatzeko asmoz.

Bonbardaketak amaitu ziren egun hartan, beste jazoera bat izan zen, hiriaren egoera are larriago bihurtu zuena: miliziar gehienak hiritik atera eta gero, kontrolik gabeko soldadu batzuek ibilgailu blindatu bat hartuta hiriko zenbait etxeri su eman zieten; suteak, batez ere, Errebal kalea erre zuen. Gertaera hori erabili zuten Frankorekin bat zetozen komunikabideek Eibarko txikizioa errepublikazaleei leporatzeko.

Azkenean, hiria apirilaren 26an erori zen matxinatuen eskuetan. Mola jeneralak, Solchaga Zola koronelak lagunduta, egun hartan ikuskatu zuen hartu berria zen hiria, artean sutan zegoela.

Eduardo Donate

2011-03-25T00:52:00.000-07:00

AURTEN BERTON TXOTX!!!

Joan den ostiralean, martxoak 18, Eibarko Iruki sagardotegian izan ginen euskaltegikook. Afarian giro aparta izan genuen eta afalostean kantuan eta irrintzika aritu ginen. Beheko argazki hauek horren lekuko.
http://www.flickr.com/photos/50045342@N08/sets/72157626345385988/show/

2011-03-24T09:11:00.000-07:00

HITANO IKASTAROA

Hitano ikastaroan izena emateko epea martxoaren 28an zabalduko da eta maiatzaren 2an bukatuko da.

Antolatzaileak: Badihardugu Euskara Elkartea , Eibarko Udala eta Eibarko Udal Euskaltegia
Noiz: Maiatzaren 3, 10, 17, 24 eta 31n, 18:30etik 20:30era
Non: Eibarko Udal Euskaltegian
Izen-ematea: Udal Euskaltegian (943700912) martxoaren 28tik apirilaren 15era arte, eta maiatzaren 2ra arte Badihardugu Euskara Elkartean (943121775).
Zer: Hitanoaren oinarri teorikoak eta praktikoak (Eibarko hitanoa eta batua)

2011-03-11T04:42:00.000-08:00

Hartzeko pronto, emateko tonto !!

Horixe izan da esaera zaharren lehiaketan saria irabazi duen atsotitza. Hiru parte hartzailek aurkeztu zuten esaera hori: Javier Ziaranek , Arrate Arriolak eta Itsaso Izagirrek .

Bestalde, beste bost sari eman dira zozketan, eta irabazleak honakoak izan dira:

Deitze Otaduy (Bururik ez duenak hankak ibili behar)

Peru Alberdi (Berregei urte artean bizi ez dana, gero ez da biziko)

Esther Alzelai (Hainbat ate, hainbat maratila, eta beti bat soberan)

Ana Marzana (Kanpolarrosa etxekalte)

Iñaki Amuateg (Ura joan eta presia)

Zorionak irabazleei eta eskerrik asko parte hartzaileoi!

Badatoz Aratosteak!

2011-02-25T04:40:00.000-08:00

Mozorrotzeko asmorik baduzue? Ez da askorik behar izaten , ba.

Badakizue Euskal Herriko txoko askotan ospatzen direla jai herrikoi hauek, ezta? Ea ba, zenbat dakigun honetaz!

Galderatxo batzuk egingo ditugu zuen jakinduria neurtzeko.

Aurrera, ba!

Nongoak dira Ziripot eta Zaldiko?

Zein herritan ospatzen dute "elegante eguna"?

Iñauteriei zein lekutan esaten zaie"Udaberriko jaiak"?

Zeintzuk dira Aratosteak iragartzen dituzten pertsonaia zaratatsuak?

Zein da euren jatorria?

Zer esan nahi du "aratuste" hitzak?

Saia zaitez martxoaren 8rako galderei ondo erantzuten, eta ea saria lortzen duzun!

Toribio Etxebarria sariak

2011-02-21T06:10:00.000-08:00

Eibar ekintzailea, krisi garaian inoiz baino gehiago

35 proiektuk parte hartuko dute aurten Toribio Etxebarria sarien XXI. edizioan. Enpresa munduko ideien alorrean, EAEn antolatzen den lehiaketarik ezagunenetakoa dugu Eibarko Toribio Etxebarria saria. Sormena eta berrikuntza teknologikoak dira sari hauekin suspertu nahi direnak. IKT alorrekoak (Informaziorako eta Komunikaziorako Teknologiak), ingurumena zaintzekoak, energia berriztagarriekin lotutakoak eta elektronikakoak dira aurten parte hartuko dutenak; gehienak, gipuzkoarrak: 35etik 22. Martxoan jakingo dugu zein den aurtengo irabazlea.

Ekonomiaren inguruko albiste txarretara ia ohituta gauden honetan, horrelakoak entzuteak esperantza pizten du eta premia-premian gaude; izan ere, aspaldi esan zuen baten batek esperantza penaren karamelua zela.

Bolada txarrei aurre egitearena ez da berria eta lehen ere estualdietatik irteten jakin dute eibartarrek. Bestela, irakurri Eibarko Udal Euskaltegiko ikasle batek idatzitakoa ALFA enpresari buruz.

ALFA
Alfa izenari esker, Eibar oso ezaguna izan zen garai batean mundu osoan. Alde batetik, bere produktuagatik –josteko makinak- eta bestetik, bere antolakuntza eta funtzionamenduagatik.
Gaur egun, Alfa metalgintzako talde industriala da baina, hasieran, kooperatiba zen. Horrela eraiki zuten 1920ko urriaren 28an. Garai hartan, greba luze baten ondoren, langile sozialista batzuk bildu ziren eta elkarte kooperatibo bat sortu zuten: Sociedad Anónima Cooperativa Mercantil y de producción de armas de fuego, Alfa izenekoa. Izenak berak dioenez, armak egiten zituzten. Hasierako kapitala 300.000 pezetakoa izan zen.
Lehenengo lantegiak Kirikixuaneko instalazioetan, Bista Ederren egon zen Echeverria Hermanos-en tailerraren lekuan, jarri zituzten eta Smith Wesson errebolberrak, 32 eta 38 kalibrekoak, egiten zituzten. Baina arma industriak krisialdi larria jasan zuen, eta, haren ondorioz, josteko makinak egiten hasi ziren, 1925eko otsailaren 4an. Ordurako, San Andres pasealekuan zeuden eta Toribio Echevarria zen garai hartan kudeatzailea. Laster, Espainiako josteko makinen produktoreen artean lehenengoa izan zen: 1927an, 175 makina egin zituen; 1928an, Estatuak 880 makina enkargatu zizkion eta, handik gutxira, 12.000 egitera iritsi ziren. 1932tik aurrera honako hau izan zen bere izena: Sociedad Anónima Cooperativa Alfa.
Gerra zibila bukatu zenean, langile gehienak, PSOE-koak edo UGT-koak zirenez, hilda edo ihes eginda zeuden. Gainera, instalazioak, Eibarko bonbardaketaren ondorioz, txikituta geratu ziren. 1940an, Donostiako Bankuaren laguntzaz, enpresa berreraiki zuten. Urte hartako azaroan, sozietate berria martxan jarri zen: Máquinas de Coser Alfa, S.A.
Bitartean, Munduko Bigarren Gerratea zela eta, Singer, Alemanian josteko makinak egiten zituen enpresa, armak egiten hasi zen eta Alfak Europan zegoen josteko makinen eskaerari erantzuna eman zion: urte hartan, 50.000 makina egin zituen.
Alfak hazten jarraitzen zuen: 1946an, 70 herritara esportatzen zuen; 1953an, metalak urtzeari ekin zion eta mikrofusioa hasi zen; 1975ean, aluminiozko mikrofusioaren instalazioa zabaldu zen.
Laurogei hamarkadan, Alfa lanpostuak galtzen hasi zen: krisi espedienteak zabaldu ziren, produkzioa eten egin zen, langileentzako zerbitzuak bertan behera geratu ziren eta ondasun higiezinak saldu egin behar izan zituzten. Mikrofusioak eta fundizioak mantendu zuten taldea; langileek ere dirua jarri behar izan zuten.
Alfak zuen ezaugarririk aipagarriena, kooperatiba izatea, hantxe bertan bukatu zen. Langile bakoitzak akzioak erosi behar izaten zituen enpresan lanean hasteko. Akzio haiek ordaintzeko, hileko soldataren zati bat kentzen zitzaion langileari. Beharginak, lana uzten zuenean, saldu egin behar izaten zituen zeuzkan akzioak eta, salmenta horretan, enpresan denbora gehien zeramaten langileek zuten akzioak erosteko lehentasuna. Modu horretan, kapitala langileen artean banatuta geratzen zen. Kapitalaren gehiengoa eta enpresaren erabaki nagusiak langileen esku zeuden.
Hori dela eta, Alfak zerbitzu sozialak eta onurak eskaintzen zizkien langileei:
- ekintza sozialetarako fondoak
- langileentzako sorospen kutxa
- lan prebentziorako kutxa
- lehen hezkuntzako eskolak
- etxebizitzak
- egoitza
- jantokia
- ekonomatoa
- liburutegia
- udalekua Ondarroan.
Laurogeita hamar hamarkadan, kapital pribatuarekin -jadanik ez zen kooperatiba- ez zuten josteko makina gehiago ekoitzi eta brontzearen fundizioari ekin zioten. Horrela, gaur egun hain ezaguna dugun Alfa Arte S.A. hasi zen instalazio berrietan.
Rosario Larrea-2011

2011-02-18T05:17:00.000-08:00

Aukera ezazu esaerarik gustukoena

Badakizue esaera zaharrak bidaltzeko epea amaitu dela, eta orain bigarren faseari ekingo diogu. Bidalitako esaera guztiak http://www.eibarko-euskara.com/ helbidean jasota daude eta bertan sartuta eman ahal izango duzue botoa. Oso erraza da botoa ematea, klik bat egitea nahikoa baita. Epea martxoaren 6an amaituko da eta sari mordoska banatuko dira (Coliseorako sarrerak, museorakoak...)
Anima zaitez eta ez utzi biharko gaur egin dezakezuna!

2011-02-11T03:56:00.000-08:00

SAN VALENTIN EGUNA

Ah maitasuna! ah l´amour! zenbat buruhauste ematen dizkigun!Baina zer da maitasuna? Hona hemen hiztegian aurkitu dugun definizioa:

Pertsona batenganako erakarpenezko sentimendu bizia, samurtasuna eta erakarpen fisikoa barne hartzen dituena.

San Valentin egunean tipikoa izaten da loreak oparitzea edo afaltzera gonbidatzea, baina gure ustez, hori bezain garrantzitsua da maitasun aitormena hitzez adieraztea. Egin al duzu inoiz horrelakorik?
Gaur ere lanean jarri nahi zaitugu baina lan samurra izango da. Saia zaitez zure maiteari esango zeniokeen mezurik politena edo orijinalena asmatzen eta idatziguzu.

Hauek dira guk aukeratu ditugunak:

Nere bizitzari argia ematen dion pertsona bakarra zu zara bihotza.
Zu nire bezain ni zure, bide banatan baino batean ez hobe?
Arraintsua itsasoa, landaretsua basoa, zu zaitut beti nire bizitzan, maitasunaren gozoa.

Zer iruditzen zaizkizu?

San Valentin egun erromantikoa pasa ezazu!
(bikoterik ez duzuenok , goza ezazue abesti polit honetaz)

Imanol - Zure tristura

Zure tristura nabari dut
keinu partikular gisan,
dintasunez hain tristea
nola nahi zenuken izan.

Dintasunez hain tristea
kaletan zoazean,
ezpainak krabelin xuri
bihotza oinazepean.

Desafiozko hauzitan
epai zorrotzen esale,
ezer ez daukazularik
maitasunaren eskale.

Maitasuna maitasuna
romantikoen uharte,
penak desegingo zaitu
odola izoztu arte.

Zure tristura nabari dut
keinu bakarzale gisan,
etsipenean hain harro
nola nahi zenuken izan.

2011-02-04T02:56:00.000-08:00

Santa Ageda

Santa Agata jaia edo Dona Agata jaia, euskalkietan Santa Ageda bezpera, Agate Deuna jaia eta Santa Ageda festa izenez ere ezaguna, otsailaren 5ean, edo bezperan Euskal Herrian eta katolizismoak indarra duen edo izan duen beste hainbat tokitan ospatzen den jaia da. Izan ere, Cataniako Agata santuaren eguna otsailaren 5a da Eliza Katolikoaren santutegian, eta ohitura da egun horretan edo bezperan herrietan koplak kantatu eta diru edo janari eske ateratzea. Euskal Herriko herri askotan, makilekin ateratzen dira kalera, erritmoa markatzeko lurrean joaz; beste herri batzuetan, Kintoak ospatzen dira egun horretan.

Eibarren ere ospatzen da. Sostoa abesbatzako partaideek Santa Ageda bezperako kalejira egingo dute gaur, otsailak 4, erdi aldeko kaleetatik. 19.00etan hasiko dira kantu errepertorioarekin, modu horretan urteroko ohiturarekin jarraituz.

Ez dakigu horrelakorik abestuko duten baina honako bertso hauek aurkitu ditugu eta zuen gustukoak izango direlakoan, hemen doaz:

SANTA AGEDA

Bertsoak: Kepa Enbeita, Urretxindorra

Gabon etxeko nagusi ta txiki
zar eta gazte batera
Alkate Jaunan baimenaz gatoz
Zueri agur eitera
Lenauko zarren antzera
Bagatoz zeuen etxera
Santa Agedaren gorazpen aintzak
Euskeraz abestutera

Eibarren dagoz gauza ederrak
oso ederki egiñak
izkillu-olak, gizon aundiak
mutil indartsu gordiñak
andra eder ta bikañak
neskatxa polit apañak
udabarriko lili ta lora
diran lakoxe berdiñak.

Illarteraño Jaungoikozale
garbi-garbia izan zan,
orbandu gura ez ebalako
bularrak ebai eutsezan;
ziñopa eginda il zan;
orain dago zeruetan.
Bere antzeko garbizaliak
gu ere izan gaitezan

Eibar euskaldun erri maitiau
ospetsua da benetan,
bertako seme jator zintzuak
daukaguz goien munduan.
Pelotarien artian
Migel dogu gallurrian:
Pozez beterik ikusten dogu
mutil au gure errian

Zorioneko izango al da
Etxe au beti-betiko;
bizi garen arte guzian
dogu goguan eukiko
Maitagarria dalako
ta orain belutu orduko
Agur! egiñik amaitzen goiaz
Beste batera juateko.

SANTA-ESKEAN: KURA-PARROKO MONDONGO

Testua: San Martinek jasoa

Kura-parroko mondongo
ik ez dok asko emongo
ik emondako limosniakin
ez juago asko edango.

2011-01-28T04:26:00.000-08:00

Astebete duzu parte hartzeko! Bota ezazu zure proposamena epea amaitu aurretik!

Esaera zaharren lehiaketa

Ate irekien eguna dela eta, Udal Euskaltegiak eta AEK-k Esaera zaharren lehiaketa antolatu dute, Eibarko Udalaren lankidetzaz.

Parte hartu nahi dutenek esaera zahar bat ekarri behar dute. Esaera hori euskaltegi bietan jarrita egongo diren kutxetan sartu behar da, horretarako dagoen txarteltxoa bete ondoren.

Posta elektronikoz ere har daiteke parte, mezua helbide hauetako batera bidalita:
euskaltegiaeibar@telefonica.net
eibar@aek.org

Epaimahaiak hautatuko du irabazlea. Saria Coliseoko emanaldi baterako bi sarrera, Museorako beste bi sarrera, Kalamuako Parlamentua jokoa eta Julen Zabaletaren Eibar, Tintaz eta Lumaz liburua izango da.

Bestalde, parte hartu duten guztien artean, hainbat sari zozketatuko dira:
*Zozketako lehenengo hirurentzat: Kalamuako Parlamentua jokoa eta Eibar, Tintaz eta Lumaz liburua.
*Zozketako 4. eta 5.arentzat: Museorako bina sarrera eta, Museora bertara joanez gero, Eibar. Ciudad taller liburua.

Esaerak urtarrilaren 31tik otsailaren 11 arte jasoko dira.

Anima zaitez parte hartzera. Oso erraza da!

greba deialdia

2011-01-24T08:55:00.000-08:00

Ostegunean, urtarrilaren 27an greba egingo dugu Eibarko Udal Euskaltegiko langileok

Pentsio publikoen sistema hankaz gora jarri nahi digute: 67 urterekin jubilazioa, kotizazio-urte gehiago behar, oinarria kalkulatzeko urte gehiagori begiratu, jubilazioak eskastu, eros-ahalmena galdu...

2011-01-14T02:27:00.000-08:00

MATRIKULA ZABALIK

Urtero bezala, urtarrilarekin batera, euskaltegian matrikulatzeko aukera zabaldu dugu. Beraz, badakizu, euskara ikasi, hobetu, landu nahi baduzu, etor zaitez!

EGA azterketarako matrikula epea ere zabaldu da, hilaren 21 arte duzu matrikula egiteko aukera. Matrikula derrigorrez Internet bidez egin behar da.

OHARRA: Bai atarikoak, bai azterketa idatziak aldaketak izango ditu. Hauen nondik norakoak ikusteko jo helbide honetara :

http://www.hezkuntza.ejgv.euskadi.net/r43-euskcont/eu/contenidos/informacion/dih1_ega/eu_ega/ega_e.html

Argibide gehiago nahi izanez gero, jo euskaltegira.

2010-12-22T04:02:00.000-08:00

Josu Mendikute euskaltegiko ikasleekin

Asteartean, hilak 21, Josu Mendikute eibartarra Udal Euskaltegiko eta AEK-ko ikasleekin egon zen Internteko sare sozialen gainean berba egiten. Josu Mendikutek ikus-entzunezko ikasketak egin ditu eta CodeSyntax enpresan dihardu lanean. Eibar.org-eko arduraduna da eta Sustatu.com-eko editoreetako bat.
Ikasleek aukera izan zuten galderak egiteko Facebook-ek edo Twiterrek sortzen dituzten zalantzen inguruan. Bidez batez, Interneteko nabigatzailea euskaraz konfiguratzeko aholkua eman zigun. Oso hitzaldi interesgarria.

2010-12-17T03:41:00.000-08:00

EZETZ ASMATU!

Hiru preso heriotzaren korridorean daude noiz hilko zain, bat itsua da. Gartzelako zuzendariak bost kasko dauzka , bi zuri eta hiru beltz eta bana jarriko die hiru presoei ea zein koloretakoa duten asmatzen duten. Asmatzen duena aske geratuko da, noski, bestela zertarako sartu jokoan!

Lehenengo presoak, beste bien kaskoak ikusi ondoren, ezin du asmatu ze koloretakoa den berak duena; ondorioz, hil egingo dute.

Bigarrenari ere gauza bera gertatzen zaio, ez daki ze koloretako kaskoa duen. Hau ere zulora!

Baina hirugarrenak, itsua berau, beste biei entzundakoagatik, badaki bere kaskoak ze kolore duen.

Zein da itsuaren kaskoaren kolorea? Nola dakizu hori?

Hona hemen beste asmakizun bat!

Zure aurrean ate bat itxita dago eta atearen alboan hiru interruptore. Ateak izkutatzen duen gelan bonbilla bat itzalita dago. Bonbilla pizten duen interruptorea zein den asmatu behar duzu, baina atea behin bakarrik ireki dezakezu; beraz, arazo handi baten aurrean zaude. Nola asmatuko duzu zein interruptoreri sakatu behar diozun?

Lagun batek esan dit honako irudi hau oso pista ona dela. Ez dakit, ba!

2010-12-02T07:51:00.000-08:00

EIBAR KANTU KANTARI

Abenduaren 3a Euskararen eguna dela eta, Eibarko Udalak eta eta kitto Euskara elkarteak antolatuta, kalejira egingo da Untzagatik hasita . Herritarrok kalera irtengo gara betiko euskal kantak abestera. Goizean, ikastetxeetako ikasle eta irakasleek jardungo dute eta arratsaldean parte hartzea libre izango da. Abestea gustuko baduzu eta euskararen aldeko jarrera erakutsi nahi baduzu, ez zalantzarik izan! Etorri 6.30etan Untzaga plazara eta hasi kantuan!! Baina, ez pentsa, ez gara bakarrik egongo, txistulariak, trikitilariak, abesbatzak .... lagun izango ditugu. Euskaltegikook ondo- ondo ikasita eraman behar dugu Behin batean Loiolan kanta. Beraz, badakizue.... hasi prestatzen!!!

Badatoz Sanandresak!!

2010-11-19T04:10:00.000-08:00

Badatoz Sanandresak!!

Urtero bezala aurten ere ospatu beharko ditugu Sanandresak, ezta? Festa handia, benetan, eibartarrontzat. Nola ospatuko duzue? Ez duzue, ez, aspertzeko betarik izango; izan ere, bezperako parrandaz gain, egunean bertan ere, "aje" handirik ez baduzue, behintzat, azokaz gozatzeko, bakailua , txorizoa, saagardoa, gazta...dastatzeko aukera paregabea izango duzue eskura.

Eibartarrok elgoibartarrekin beti izan dugu harremana, batzuetan ona, besteetan ez hain ona ,eta egun honekin zerikusia duen istoriotxo bat ere badago. Ziur zuetako norbaitek zerbait badakiela.

Anima zaitezte dakizuena kontatzera!

2010-11-05T04:53:00.000-07:00

KONTALARIA egitasmoa iritsiko da Eibarrera larunbatean, azaroaren 6an.

Untzagara bertaratzen direnen artean ipuin bat asmatuko dute. Horretarako antolatzaileek ipuin baten hasiera emango diote iritsitako lehenengoari. Ondorengoek jarraipena eman beharko diote. Bakoitzak lau minutuz aritu beharko du.

Hizkuntza Politikak eta Eibarko udaleko Kultura Sailak antolatutako kanpaina honen helburua euskararen erabilera bultzatzea da. Adin eta era guztietako jendearen parte-hartzea sustatu nahi da.

Informazioa gehiago: www.kontalaria.net

Honen haritik guk ere proposamen bat daukagu zuentzat. Ondo irakurri!

Ipuin baten hasiera emango dizuegu eta zuen lana izango da horri jarraipena ematea. Ea ipuin polita ateratzen zaigun!

Ez badakizue nola jarraitu, beste ipuin bat kontatzen has zaitezkete.

Ekin idazteari!

1825eko urtarrilaren 25ean Untzaga plazan eibartarren egunerokoa aldatuko zuen gertakari bat izan zen. Koxme jaio zen. ...

2010-10-29T03:07:00.000-07:00

Sariak literaturan

Aurtengo urria ere oparoa izan da literaturarako. Hona hemen saritutako aleetako bi.

Anjel Lertxundi euskal idazleak eskuratu du Espainiako Saiakera Saria, Kultura Ministerioak urtero banatzen duen saria Literatura Sari Nazionalen baitan. Eskarmentuaren paperak obra saritu diote. Literaturaz egin du gogoeta idazle oriotarrak, baina autobiografiatik ere asko du

Euskadi Literatura Saria Fermin Etxegoien (Oñati, 1966) oñatiarrari emango diote Autokarabana bere lehen eleberriarengatik. Kooperatiba baten lan egiten duen pertsonaiaren istorioa kontatzen du eleberri horretan.

LEHEN EUSKAL LIP DUB lehiaketaren irabazlea......

2010-10-19T03:19:00.000-07:00

(Argazkia: Mikel Askasibar)

EIBARKO UDAL EUSKALTEGIA!!!!!!

Apiriletik hona euri asko egin du, baina , nonbait, ez geneukan guztiz ahaztuta gure LIP DUB-a. Izan ere, aurreko ostiraleko Finaleko Galan (Coliseoan) zuetako asko izan zineten (gutakoak ere bai, noski) eta denon botoei esker IRABAZLE atera ginen. Beheko bideoan ikusiko duzue nolako
sorpresa hartu genuen !!!!

http://www.youtube.com/watch?v=ODcTctANSbw

Orain, saria nola banatu pentsatzen ari gara. Beraz, zuen iritzia laga nahi baduzue, blog honen bitartez egin dezakezue.

HEMEN GARA BERRIZ ERE

2010-09-21T09:21:00.000-07:00

Epa guztioi:
Iraila iritsi da eta honekin batera urtea antolatzeko unea. Ikasturte honetan zer egingo duzu? Marrazketa? Keramika? Kirola? Arpa jo? eta EUSKARA ezta?
Badakizue non gauden eta jakin ezazue zuen zain gaudela. ANIMO eta EKIN EUSKARARI!!!!

Setienbria, iraila, agorrila, buruila....

2010-09-01T23:19:00.000-07:00

Abuztuaren ondoren datorren hilabete honek badu izenik, gero!

Uda amitzear; iturriak erdi agortuta; mendi-bizkarrak iraz edo garoz gorrituta; babak, artoak eta abarrak burututa eta eskolak ateak irekitzen -batzuek "ira" horrexekin lotuko dute, agian-.

Izenetik hobeto dabil, bai, hilabete hau entzute onetik baino. Begira esaera zaharretan nola ageri den:

. Ama Birjiña aguztuko (15ean), urtean bi aldiz balitzeke! Ama Birjina urriko (iraileko), iñoiz ez al duk etorriko!

. Ama Birjina urriko (irailaren 8an), inoiz ez al duk etorriko!

. San Juan eta San Pedro, astero balego! -Ta Ama Birjina urriko (iraileko)? -Iñoiz ez al duk etorriko!

. Morroien siesta: maiatzeko santaku(ru)tzetan hasi eta agorreko (iraileko) santakutzetan utzi.

. Agorrilak ontzen, buruilak (irailak) biltzen.

Baten batek ezagutzen badu hilabete honekin edo garai honekin lotutako beste esaera zaharrik, hemen dauka tokia erakusteko.

2010-06-23T03:20:00.000-07:00

SAN JUAN SUAREN INGURUAN

Gau berezia da Euskal Herrian San Juan gaua.

Ohiturari jarraituz, jendea suaren inguruan batzen da espiritu txarrak uxatzeko eta gurariak bete daitezen eskatzeko; izan ere, lehengo pentsaera eta bizimoduan oinarrituta, sua gauza txarretatik aldentzeko eta gauza onak babesteko egiten zen.

Gure arbasoak, sorginen gaua zela-eta, San Juan lora-erramuak egiten hasi ziren, espiritu txarrak aldentzeko. Ohitura horrek bizirik dirau, Bizkaian batez ere. Lizarra erabiltzen da lora sortak egiteko, eta etxeetako atarian nahiz leihoetan jartzen dira. Zenbaitek garia eta artoa gordetzen dituzte lora sortan ipintzeko.

Animaliek ere badute bere garrantzia San Juan jaien inguruan, apoak eta sugeak batik bat, honelaxe baitio San Juanetako kantuak:

"San Juan gabilea
Sapuak eta sugeak erre
Artoak eta gariak gorde"

Eibarko jaietan San Juan sua 23:30ean izango da, Untzaga Plazan. Beraz, animatu eta kantuak dioen moduan: sapuak eta sugeak erre eta artoa eta garia gorde, hori eginda urte ezin hobea izango duzue eta.

2010-06-11T02:23:00.000-07:00

EIBARKO KORU GAZTEA PORTALEKO ARETO NAGUSIAN

Euskaltegiaren 25. urteurrena dela-eta, ekainaren 17an aukera ezin hobea izango dugu ETB1 telebista-kateko "Oh happy day!" programan aritu den Eibarko Koru Gaztea zuzenean ikusteko.

Koru Gazteak hainbat kantu abestuko ditu Portelako Areto Nagusian, iluntzeko 8etan, eta gainera galderak egin ahal izango dizkiegu.

Anima zaitezte eta, badakizue, presta itzazue nahi dituzuen galdera guztiak zuen jakinmina asetzeko.

Osteguna arte!

2010-06-04T04:39:00.000-07:00

KANTU-TAILERRA

Maiatzaren 27an Portaleko areto nagusian kantu-tailerra izan genuen Ibaia taldearen eskutik.

Entzun ez ezik kantatzeko aukera aparta ere izan zen, bai horixe! Beti-betiko kantak, bihotzetik ahora zuzen datozen horietakoak: Furra-furra, Eperra, Xalbadorren heriotzean...

Han izan ez zinetenok kanta horiez gozatzeko aukera izan dezazuen, hona hemen bideotxo bi letra eta guzti.

2010-05-28T04:20:00.000-07:00

Ekonomia eta astoak
Behinola gizon bat agertu zen herritxo batean. Herritarrei esan zien astoak erosten zituela 100 euroan, eta batzuek astoa saldu zioten. Biharamunean itzuli eta 150 euroan erosi zituen astoak. Orduan herritar gehiagok saldu zion astoa gizon ezezagunari. Hurrengo egunean 300 euro ordaindu zuen asto bakoitzeko, eta oraindik astoa zuten guztiek astoa eman zioten gizonari diruaren truke.
Herrian asto bakar bat ere gelditu ez zen egunean, gizonak 500 euro eskaini zuen asto bakoitzeko, eta aditzera eman zuen biharamunean itzuliko zela erostera.
Orduan bere lankide bat bidali zuen herrira asto guztiekin eta salgai jarri zituen 400 euroan. Herritarrek, 500 euroan salduko zituztelako esperoan, asto guztiak erosi zituzten, baita inguruko herrietakoak ere. Eta dirurik ez zuenak mailegua eskatu zuen.
Susmatzekoa denez, laguntzailea eta hasierako gizon ezezaguna betiko desagertu ziren.
Herria astoz eta zorrez josita geratu zen. Mailegua eskatu zutenek ezin izan zuten dirua itzuli, astoa saltzerik ez zutelako. Mailegua eman zutenek, dirua ezin izatean jaso, kexaka joan ziren udaletxera esanez mailegu gehiagorik ezin zutela eman. Udaletxeak, zordunei eman beharrean dirua, mailegu-emaileei eman zien laguntza, sistema ez jausteko. Baina hara non mailegu-emaileek ez zieten zorra barkatu zordunei eta hauek zorra (eta interesak) ordaindu ezinean zeudenez, dirua eta astoak galdu zituzten.
Udaletxea, bere aldetik, mailegu-emaileei laguntza luzatu ostean, bera ere zorretan geratu zen, eta orduan funtzionarioei jaitsi zien soldata.
Ipuinak ez dio, baina astoen eroslea eta haren kidea irla paradisiakoan imajinatzen ditut, barrez lehertu beharrean.

Laura MINTEGI Idazlea

TANTANEZ TANTAN, EIBARREN EUSKARAZ BIZI!

2010-05-14T04:42:00.000-07:00

Eibarko Euskalgintzak orain dela bi urte antolatu zuen lehenengoz Gantxillaren ekimena, eta orduan izandako arrakasta ikusita aurten ere errepikatzea pentsatu da.

Eibar euskalduntzeko asmoa eta euskaraz bizitzeko gogoa dugunok urez betetako gantxilla eramango dugu Urkizuko iturritik Untzagaraino giza katea osatuta. Nahikoa da lepoan baserritarren koadrodun zapia eramatea eta euskara ahoan.

Hurrengo larunbatean, hilak 22, eguerdiko ordu batean emango zaio hasiera ekimen honi.

Animatu eta eman izena euskaltegian, jendea behar da katea osatzeko eta!

2010-05-03T08:13:00.000-07:00

Gustatu bazaizu eman botoa!. Gogoratu, erregistratu eta kontu bat sortu behar duzula youtuben, botoa eman ahal izateko; bestela, ez du balio.

2010-04-30T03:29:00.000-07:00

LIP DUB-aren basckstage-a

Bideo kamarak harrapatu ez zituenak lotura honetara ekarri ditugu. Gozatu!!!

http://www.flickr.com/photos/50045342@N08/show/

2010-04-23T03:03:00.000-07:00

Badoa Apirila

Egon al zinen larunbatean Euskaltegikoon Lip Dub-aren grabaketan?

Ta? Zer moduz? Polita izan al zen, atsegina? Ala luzea, aspergarria... Kontaiguzu.

Dena den, bertan izan ez bazinen, ostegunetik aurrera Youtuben ikusteko aukera izango duzu (gogoratu: "katuek bezala hormatik ixotzen naz uh uh uh...").

Badakizu zein zen grabaketaren helburua, ezta? Eibako merkataritza eta ostalaritza sustatzea.

Horrekin lotuta, maiatzaren 3an, astelehena, "Mugaldekoak" filma ikusi nahi baduzu, eta sarrerarik ez badaukazu, Merkataritza Gune Irekiko kide den edozein dendatan 30 €tik gorako gastua eginez gero, doan emango dizute bat. Bai ederto! Aprobetxa ezazu!!

Euskaltegiaren 25. urteurrena

2010-04-16T00:34:00.000-07:00

Badakizu 25 urte betetzen ditugula?

1985eko apirilaren 1ean jarri zen martxan Udal Euskaltegia. Hasierako gelak Frontoi Zaharreko Eskolan zeuden. Handik Untzagako "Casa del Pueblo"-ra joan ginen eta azkenik, Portalera.

25 urte hauetan hainbat ikasle eta irakasle pasatu da bertatik eta hainbat gorabehera, buruhauste eta pasadizo.. bizi izan ditugu; hemendik aurrera ere zuekin guztiokin batera horrela jarraitzea espero dugu.

Eskolak emateaz gain, bestelako jarduera batzuk ere antolatzen ditugu eta gure zilarrezko ezteiak ospatzeko egitarau txiki bat prestatu dugu.

Apirilaren 27an Kirmen Uribe etorriko zaigu hitzaldi bat ematera eta 29an Debako GOAZ Antzerki Taldeak Iñaki Zabaletaren "110. street-eko geltokia" liburuan oinarritutako antzezlana eskainiko digu. Maiatzaren 3an, berriz, "Mugaldekoak" filma estreinatuko da Coliseoan.

Baina horren aurretik gogorarazi nahi dizuegu datorren larunbatean, hilaren 24an, hitzordua dugula Zuloagatarren kalean, Udalak antolatu duen LIP DUB
lehiaketarako grabazioa egiteko. Euskaltegiko ikasle zareten guztiok gonbidatuta zaudete.

Aurrerago ere emango dizuegu antolatzen ditugun ekitaldien berri.

Hor goian jarri dugun argazkian inor ezagutzen duzu? Asko aldatu al gara? Etxean horrelako argazkiren bat baldin badaukazu ekarri Euskaltegira.

2010-03-25T06:41:00.000-07:00

HITZALDIA

“TABUAK HAUR LITERATURAN”

Hizlaria: Txabi Arnal Gil, idazlea eta irakaslea
Eguna: apirilak 12, 17:30
Tokia: Eibarko Juan San Martin Liburutegian

Umezaintza zerbitzua egongo da

“Badirudi haur literatura esnatzen ari dela pixkanaka-pixkanaka urte askoko loaldi hipokrita batetik, eta tristuraz, heriotzaz, banantzeez, atzerriratzeez eta baztertzeez janzten ari dela, baina baita hainbat kolorez (inoiz baino gehiago) eta maitatzeko, sentitzeko eta zoriontsu izateko modu anitzez ere”

Udal Euskaltegiaren 25. urteurrena

2010-03-18T07:21:00.000-07:00

ANTXINTXIKETAN

Horixe izan da Berba lehiaketan irabazi duen hitza. Bi lagunek aukeratu dute antxintxiketan berba, eta biek eskuratu dute saria: Luzi Ibazetak eta Gorka Bustinduyk. Hauxe irabazi dute: Coliseorako bi sarrera, Kalamuako parlamentua jokoa eta Eibar oasi liberala liburua.

Gainerakoen artean, beste hiru sari eman dira. Sari horiek jaso dituztenek hitz hauek jarri dituzte: txotxolo, tximeleta eta trikitrixa. Garbi dago gure parte-hartzaileek tx hizkia gustuko dutela!

Parte-hartzea handia izan da, guztira 89 berba bildu dira: biribilketa, zintzilik, potrosoa, txilibito, dzanga, zangalatrau... Berba guztiak http://www.eibarko-euskera.com/ atarian jarriko dituzte.

2010-03-12T04:25:00.000-08:00

EIBARKO ANTZERKI JARDUNALDIAK

Aurrera doa aurtengo antzerki jardunaldia. Asko dira dagoeneko ikusi ahal izan ditugun obrak, eta iritzi asko izango da bazterretan. Batzuentzat 666 lana izan da onena, barrez lehertzeko modukoa; beste batzuentzat Concha Velasco bezalakorik ez dago. Askok izugarri ondo pasatu dute Euskarazetamol laneko antzezleen txiste eta hitz jokoekin. Baina zuk zer deritzozu? Zein izan da zure ustez onena? Zeinetan gozatu duzu? Saioren baten aspertu edo egin zara?

2010-03-05T05:10:00.000-08:00

EUSKARAZKO BERBEN LEHIAKETA

Eibarko Udalak antolatuta eta Eibarko bi euskaltegien partaidetzaz (Udal Euskaltegia eta AEK euskaltegia) abian jarri da Euskarazko berben lehiaketa.

Martxoaren 12ra arte duzue parte hartzeko.

Zuek aukeratutako berba (gozoena, bortitzena, zailena, politena, arraroena...) euskaltegi bietan bereziki horretarako jarrita dauden kutxetan sartu beharko duzue, edo posta elektronikoz mezua helbide hauetako batera bidali:

euskaltegiaeibar@telefonica.net edo eibar@aek.org

Garaileak sari hau eskuratuko du: Coliseoko emanaldi baterako sarrera bi, Kalamuako Parlamentua jokoa eta Eibar oasi liberala liburua. Gainontzeko parte hartzaileen artean jokoaren eta liburuaren hiru ale zozketatuko dira.

Ea berba bilduma polita egiten dugun denon artean!

EZETZ ASMATU!!!!!

2010-02-26T05:24:00.000-08:00

Hona hemen JOKU, JOLAS, DENBORAPASA polita.

Klikatu helbide honetan eta ondo pasa, burua hautsi edo dena delakoa egin.

http://www.zernola.net/informazioa/jolastuz_ikasi/jokoak/2005/01/erreka.swf

Jolastu duzu? Asmatu duzu? Kontatu zure esperientzia.

Lehiaketa Gipuzkoako Udal Euskaltegietan

2010-02-19T01:08:00.000-08:00

Gipuzkoako Udal Euskaltegiek urteak daramatzate lehiaketak antolatzen bere ikasleek parte hartzeko eta, bide batez, euskal kulturan janzteko. Eibarko Udal Euskaltegikook gutxitan parte hartu izan dugu, hala diote behintzat. Bada, aurtengoan ez da hori gertatuko. Hemen daukazu hil honetako galdera. Egin klik helbide honetan eta ea asmatzen duzun erantzuna. Suerte on!

http://www.udaleuskaltegiak.net/lehiaketa

2010-02-10T23:13:00.000-08:00

... eta irabazleak ...

2010-02-05T05:26:00.001-08:00

Dastaketa egin ondoren, hona hemen irabazleen izenak:

Goizean: Ana Areitio

Arratsaldean: Marisa Gomez

Kamiseta bana eraman dute, pozik, gainera! Giro atsegina izan zen, benetan. Horren lekuko ondoko argazkiak.

San Blas lehiaketa

2010-01-22T03:18:00.000-08:00

Ez dago eibartarrik San Blas eguna noiz den ez dakienik. Izan ere, otsailaren 3a egun berezia izaten da gure herrian. Aurten, herrian ez ezik euskaltegian ere egunari berea eman nahi diogu. Horretarako, San Blas opilen lehiaketa egitea bururatu zaigu. Nola egingo dugu? Zeinek erabakiko du zein den San Blas onena? Horiek eta antzerako galderak etorriko zitzaizkizuen burura, ezta? Bada, hona hemen argibide batzuk:

- Taldeko opil bakarra aurkez daiteke , zeinek egingo duen taldean erabaki beharko da.

- Epaimahaia ikasleek osatuko dute (taldeko ikasle bat, hori ere taldean erabakitzekoa).

- Dastaketa San Blas egunean bertan egingo da, baina opilak otsailaren 2rako ekarri behar dira euskaltegira.

- Irabazleak kamiseta zoragarri bat eramango du eta trukean errezeta ekarri beharko du blog-ean zintzilikatzeko.

Gehiago? Bada, zalantzak sortu ahala irakasleok argituko dizkizuegu. Bitartean, hasi planak egiten!!!!

Gabonetako postalak

2009-12-23T03:34:00.000-08:00

Gabonetako postalak

Baduzu ohiturarik lagunei- eta postalak bidaltzeko? Horretarako noiz hobeto Gabonetan baino?
Postala bidaltzen asmatzen ez baduzu, saia zaitez gutxienez lagunak, ikaskideak, irakasleak.... zoriontzen.

Aurrera!

Zozketaren irabazleak

2009-12-18T03:05:00.000-08:00

Hauxe zen gure Gabonetako otarraren prezioa: 181.50 euro. Ez zarete oso urrun ibili, baina gehien hurbildu direnak ikasle hauek izan dira:

Jose Antonio: 188 euro
Denise: 183 euro
Esther: 183 euro

Beraz, astelehenean pasatu irasle-gelatik eta euskaltegiko kamiseta bana jasoko duzue. ZORIONAK!!!

Gabonetako Lehiaketa

2009-12-04T04:02:00.000-08:00

Urtero "Gabonetako otarra" zozketatzen dugu. Talde bakoitzak produktu bat erosten du eta denon artean saski ederra osatzen dugu. Aurten, krisia dela eta, saiatu gara diru gehiegi ez gastatzen, baina ez dakit lortu dugun. Izan ere, Gabonak Gabonak dira, eta ezin laga ospatu barik.

Gogoan duzue Matias Pratek duela urte batzuk aurkezten zuen "El precio Justo" izeneko saioa? Parte hartzaileek hainbat gauzaren prezio zehatza asmatu behar zuten, eta gehien hurbiltzen zenak irabazten zuen.

Guk ere gauza bera pentsatu dugu, eta lehiaketaren galdera hauxe izango da: zenbat balio du gure otarrak? Ideia bat egiteko hemen duzue produktuen zerrenda:

Errioxako ardoa
Txorizoa, txistorra eta odolostea
Urdaiazpikoa
Tolosako babarrunak eta Ibarrako langostinoak
Patxarana eta Markinako kokoteak
Mahats pasak, okaran pasak, piku-pasak, orejoiak....
Piper gorri eta berdeak
Idiazabalgo gazta
Gulak
Euskal turroia eta bonboiak
Errezil-sagarrak, piña, melokotoiak
Intxaurrak, urrak eta membrilloa
Patea edo Iparraldeko foie
Astigarrako sagardoa eta Bakioko txakoliña
Txanpaiña
Zainzuriak, antxoilak, atuna

SARIAK: gehien hurbiltzen diren 3 ikasleek kamiseta polit bana eskuratuko dute.

ANIMATU ETA PARTE HARTU!!

2009-12-04T03:46:00.001-08:00

Abenduaren 3an euskararen eguna

2009-11-27T03:07:00.000-08:00

Jakingo duzuenez abenduaren 3an euskararen eguna ospatzen da. Hori dela-eta, aurten Eibarko Udalak eta ...eta Kitto! Euskara Elkarteak, Eibarko gainerako elkarte eta erakundeekin elkarlanean, eta Urkotronic eta Caixaren babesarekin Euskararen Nazioarteko Eguna antolatu dute.

Egun horretan Juan San Martinen Zirikadak eta Eztenkadak liburuen jendaurreko irakurketa egingo da, goizeko 8etatik iluntzeko 8ak arte. Ekitaldian parte-hartzaile ugari izango dira: udal ordezkariak, babesleak, San Martin familia, ikastetxeak, udal eskolak, euskaltegiak, kirol eta kultur elkarteak, UEUko ordezkariak, euskara plana duten enpresen ordezkariak, herritarrak...

Juan San Martin

Juan San Martin Ortiz de Zarate (Eibar, 1922-Hondarribia, 2005) euskal idazle, arkeologo, etnografo, mendizale, Ararteko eta euskaltzaina izandakoa da.

Espainiako Gerra Zibilaren garaian erbestera joan behar izan zuen, familiarekin batera, beste hainbatek egin bezala. Artikuluak argitaratzen 1950eko hamarkadan hasi zen. 1959an kaleratu zuen lehen liburua: Juan Antonio Mogel. Bere bizitza ta lanak. Poemak idazteko Otsalar ezizena erabili zuen, 1960ko hamarkadan erreferentzi bihurtuz. 1964an euskaltzain oso izendatu zuten, eta 2006an Eibarko seme kuttun.

Zirikadak eta Eztenkadak

Zirikadak 1960an idatzi zuen, eta Eztenkadak, 1965ean. Soraluze eta Eibarko herritarren umorea agertzen duten kontakizunez daude osaturik, eta Juan San Martinek haien ahotik entzun zituen eran jasoak. Eibar ingurukoek erabiltzen duten euskaran eman zituen ezagutzera Juan San Martinek kontakizun guztiak, euskaraz hain gutxi irakurtzen zen garai hartan inguru horietako euskaldunak euskaraz irakurtzen ohitzeko erarik hoberena zelakoan.

Zenbat urterekin jubilatu nahi zenuke?

2009-11-20T02:28:00.000-08:00

Azken egunotan hautsak harrotu ditu Television Españolako zuzendariaren izendapenak. 81 urteko gizonezkoa aukeratu dute lanpostu horretarako, eta duela gutxi langile pila bat aurrejubilatu dituzte 50 urterekin. Ederra kontraesana!. Ikasbilen gai horri buruzko tertuliatxoa dago entzungai:

Entzun ondoren, idatziguzu iritzia emanez. Zu zenbat urterekin jubilatuko zinateke?

2009-11-13T02:55:00.000-08:00

IRABAZLEAK.......

Honezkero irrikitan egongo zarete irabazleak nortzuk izan diren jakiteko, ezta? Bada, hona hemen:
Aitor eta Esther (2. mailako ikasleak) eta Mariaje Toledano (Autoikaskuntzako ikaslea) . Zorionak!!
Ea argazki bat bidaltzen diguten Blogerako , kamiseta jantzita!!!!!

GAZTAÑERRE

2009-10-30T05:20:00.000-07:00

Laster da hemen zorioneko GAZTAÑERRE eguna. Ondo dakizuen bezala, Eibarren eta inguruko zenbait herritan tradizio handiko eguna da hau. Egun honetan ohitura da gaztainak eta marraskiloak (karakolak) jatea. Zuk ospatzen duzu egun hau? Non? Norekin? Eta nondik dator aztura/ekandu hau? Badakizu? ..... konta iezaguzu.

Baina, gure kezka nagusia hauxe da: nola demontre jakin dezakegu zein egunetan den ditxosozko GAZTAÑERRE eguna?

Azaroaren 13 arte jasotako erantzunen artean 2 KAMIXETA DOTORE ASKOAK zozketatuko ditugu.

Galdetu etxean, kalean, okindegian, Bernardori (Arrate Irratia) ..... edo dena delakoari.

"Enkante" hitzaren jatorria

2009-10-09T01:45:00.001-07:00

Gaurkoan ezagutuko dugu nondik datorren enkante hitza. Ezetz asmatu?

Nondik dator hitz hau? Arabieratik? Erderatik? Ingeleratik? Zer uste duzu?

Zerekin dago lotuta? Abesteko modu bat da? Hona hemen pista bat...

Ezagutzen al dituzu beste hitz hauek? bizirik / oihuka / elkarren artean / aurreko / kantatzearekin / egunak / berandu / zerga / saltoki / pintxoko /eskaintzen / sakatzen / erosleak / txipiroia

Ea hurrengo ariketa ondo egiten duzun eta horrela jakingo duzu enkante hitzaren jatorria.
Ezagutzen al duzu beste hitzen baten jatorria? Kontaiguzu blogean...

Kotxe elektrikoak

2009-10-06T23:50:00.000-07:00

Argi dago egunen batean petrolioa bukatuko dela eta marka guztiak ari dira kotxe elektrikoak garatzen. Oraindik bateriak oso astunak dira, ez dago kotxe hauek kargatzeko lekurik, autonomia gutxi dute...

Kotxe elektrikoa erosiko zenuke?

ariketa

Berbetan

2009-10-06T00:50:00.001-07:00

Urtero bezala, aurten ere ...etakitto euskara elkarteak martxan jarri du Berbetan programa. Askotan euskara ikasleek (zuk zeuk akaso) ez dute aukera handirik ikasitakoa praktikatzeko. Mota guztietako ekintzak antolatzen dira Berbetan programaren bidez lagun artean euskara praktikatzeko. Ez dago aitzakiarik. Mendian, tabernetan, zineman... Hor ere euskaraz.

Animatu zaitezte eta izena eman.

Non geratu dira garai bateko jokaera eta manera onak?

2009-07-12T23:56:00.000-07:00

Azterketak eta txuletak

2009-06-12T00:57:00.000-07:00

Azterketa garaian gaude. Unibertsitateko azterketak, selektibidadea,hizkuntza mailak eta perfilak, Ega...Hau estresa! Askotan asko ikastea baino errazagoa da txuleta on bat egitea eta kitto. Inoiz erabili al duzu txuletarik? edota "kanbiazoa" izeneko trikimalua? Zein da ikusi duzun gauzarik bitxiena?

Publizitatea

2009-05-29T02:25:00.000-07:00

ARTEMAN publizitate enpresako Arantxa Lagunilla izan genuen aurreko batean euskaltegian publizitatearen gainean berba egiten. Oso hitzaldi interesagarria izan zen. Historian zehar publizitatea nola joan den aldatzen azaldu zigun, lehengo eta gaur egungo iragarkien arteko aldea, zerk saltzen duen eta zerk ez... "Klasiko" batzuk ere ikusi genituen: "Las muñecas de famosa", "Del caserío me fio"... Agian zuetako askok ez dituzue ezagutuko, baina 40 urteren bueltan gabiltzanontzat oso iragarki ezagunak dira.

Egia esan, gaur egun dena da publizitatea, eta hedabideetan agertzen ez den enpresa ez da ia existitzen. Iragarkien bonbardaketa izugarria da, eta horien atzean ezkutatzen den ideologia, beti ez da oso zuzen edo etikoa izaten. Baina aitortu beharra dago publizistak artista hutsak direla mezuak zabaltzen eta spotak egiten. Niri, esate baterako, kolonien iragarkiak izugarri gustatzen zaizkit; matxistak izango dira, nahi duzuena, baina estetikoki oso ederrak dira.

Gure blogean parte hartu nahi baduzue, hona hemen galdera batzuk: zer telebistako iragarki gustatzen zaizue gehien? Zer deritzozue emakumearen trataerari? Gaur egungo iragarkiak ulertzen al dira? Zein balio edo mezu nagusi ezkutatzen dira spoten atzean? Drogaren kontsumoa gutxitzeko edo istripu gutxiago izateko kanpainak eraginkorrak al dira?

Animatu eta idatzi zure iritzia. Hona hemen iragarki polit pare bat.

ZORIONAK BEGO!!!!!!

2009-05-22T04:45:00.000-07:00

ALGARAKA txiste lehiaketaren irabazlea Bego dugu, Zimaurraren txistearekin, badirudi denoi gustatzen zaizkigula gehiago marrubiak natarekin zimaurrarekin baino, kar, kar, kar.

Eta zer irabazi duen? Bada, Jasone Osoro idazle elgoibartarraren Tentazioak liburua , ipui erotikoez osatua eta serioagoa den Idatziak izeneko idazki bilduma.

DVDak euskaltegiko liburutegian

2009-05-15T05:04:00.000-07:00

Euskara ikasi eta lantzeko irakurtzea bide ona da, baina ez da bakarra.

Euskaltegiko liburutegian film batzuk, ez asko egia esan, ere baditugu lagatzeko moduan.

Zinean eman zutenean, ikusi gabe gelditu bazinen, orain duzu aukera, GAINERA EUSKARAZ!

Hona hemen izenburu batzuk:

Lorezain leiala
Gizakien seme-alaba
...

Ez galdu aukera hau!

AUKERATU TXISTERIK ONENA!

2009-05-08T04:55:00.000-07:00

Algaraka atalean 6 iruzkin/txiste daude. Irakurri dituzue? Hala bada, orain puntuak emateko garaia iritsi da.

Hiru puntu gehien gustatu zaizunari
Bi puntu hurrengoari
Puntu bat hirugarrenari

Iruzkinean egilearen izena eta zure puntuaketa idatzi

Zorte on!

Lehiaketaren emaitza hilaren 20an emango dugu. Saria "ikaragarria" izango da.

Aprobetxatu azken egunak!

ALGARAKA

2009-04-30T06:31:00.000-07:00

KRISIA, AZTERKETAK, EGURALDIA... Badugu nahiko motibo negar egiteko.

Bila dezagun, bada, barre egiteko arrazoiren bat.

Burua leihotik kanpo

Familia guztia ba omen doa kotxean, eta umea atzeko aldean burua leihotik ateratzen, eta jada ama nazkatua:
- Xabiertxo, ez atera burua leihotik!
- Ama, utz iezadazu, oso ondo noa eta.
- Esan dizut ez ateratzeko burua leihotik, e?
- Ez zait ezer pasako.
- Baietz, bada, ez atera.
Kasurik ez umeak. Halako batean, burua kanpoan zuela amak burua ateratzen du, eta
- Xabiertxo, burua sartu, bestela kontuz ibili baran-dan-dan-dan-dan-dan-dilarekin, e?

Eibarko lagunak

Matrimonio bi afaritan eta hasi ziren han, "jo", andrak hasi ziren, "gure lagunek" ez dakit nongoak "joaten dira horra, diskotekara, eta ederto pasetan dabe". Eta gure lagunek, Goiko Errotakoak, joaten dira hango beheko sala de fiestasera eta ze ederto pasetan daben, geuk be aprobea egin behar dogu. Eta esan eutsien gizonek: "bueno, tratua egingo dugu. Gu joango gara zapatu gauaz frontoira, partidua ikusten, eta zuek joan diskotekara". Joan ziren andrak diskotekara, zapatuan, baina ez zan izan eurek pentsatu ebena, eta orduan etxerantza mugitu ziren, eta oinez etxerantza, eta halako baten txizalarria bati etorri jakon, eta kanposantuaren parean joan ziren, eta sartu ziren kanposantuan txiza egiten. Eta txiza egiten dagozela mozkor batek urten eutsien holako ataute edo lapida baten atzetik, eta mozkortiek emon eutsien ikareagaz arrapaladan joan dira etxerantz dana bertan behera itxita...
Eta hurrengo egunean gizonak juntatu ziren, eta esan eutsan batek besteari:
-Ene! Gu erratu ez ete gara egin andrari diskotekara joaten itxita? Gure andrea kulero barik etorri da gero etxera!
Eta esan eutsan besteak:
-Kulero barik? Txarragoa izan da gurea: "Tus amigos de Eibar no te olvidan" lazo handi bat ipurdian ipinita.

Txiste hauek irakurri ondoren, seguru gaude barre txikiren bat egingo zenuela. Animatu eta bidali zuk ere besteren bat; horrela, gure TXISTE LEHIAKETAN parte hartuko duzu.

Ez ahaztu izena jartzea.

Liburutegia

2009-03-24T06:53:00.000-07:00

Euskaldun berri eta zaharrentzat. Maitasunezko istorioak maite dituztenentzat eta burua nekatu nahi dutenentzat. Eguraldiari buruzkoak eta klasikoak. Jatorrizkoak eta itulpenak. Egakoentzat eta lehenego urratsekoentzat. Erizain zein ingenieroentzat. Guztiontzat irekia. Eibarko Udal Euskaltegiko Liburutegia. Aukeratu zure liburua edo aholkua eskatu irakasleari. Literaturarekin gozatzeko eta ikasteko aukera duzu. Zeren zain zaude?

DEBEGESAko Aitziber Kortazar euskaltegian

2009-03-11T09:05:00.000-07:00

Gaur goizean Aitziber Kortazar, DEBEGESAko Garapen Iraunkorra saileko arduraduna, izan dugu euskaltegian. DEBEGESAren nondik-norakoak aipatzeaz gain, garapen iraunkorraren arloan zein lan ildo edo proiektu jorratzen ari diren azaldu digu. Honakoa hauek dira, besteak beste, esku artean dituzten asmoak: enpresari zuzendutako sentsibilizazioa, ekintzaileentzako esku-liburu berdea, interes paisajistikoa duten guneen gida, Deba ibaia errekuperatu eta balioa emateko programa integrala, bidegorri sarea, mugikortasun mahaia, ... Informazio interesgarri ugari jaso ahal izan dugu bertan bildu garenok.

Gai honekin nahikoa sentsibilizatuta gaudela uste duzu? Egoki erabiltzen ote dugu autoa? Zaintzen ote dugu gure inguru hurbila? Nahikoa egiten ote dute enpresek ez kutsatzeko?

HAUTESKUNDEETAN ERE LANERA!

2009-02-27T05:10:00.000-08:00

Inoiz tokatu zaizue Hausteskundeetan mahaian egotea? Jende gehienarentzat ez da oso gustukoa izaten igandean lan egin behar izatea, zer esanik ez, derrigortuta bada . Garaia iristen den bakoitzean beldurrak aidean ibiltzen gara tokatu ote zaigun jakin arte. Are gehiago lehenengo aldia ez bada, askoren ustea baita behin tokatuz gero, errezagoa dela bigarren edo hirugarren aldiz ere ateratzea. Egia da ordaindu egiten dutela. Egia da hurrengo egunean ordu batzuk hartzeko aukera egoten dela, baina ............. Zelan ikusten duzu kontua? Badu gauza onik? Langabetuek egin beharko luketen lana da?

BOGA

2009-01-16T04:27:00.000-08:00

Euskaltegira egunero etortzea ez da hizkuntza ikasteko modu bakarra. Azken urte hauetan eta leku askotan bezala, Eibarko Udal Euskaltegiak BOGA programa jarri du ikasleen eskura. Komeni zaizun ordutegian zure mailako talderik ez badago edota nahiago baduzu lan gehiena etxean egin BOGA programak aukera hori ematen dizu. Euskaltegiak tutorea eta mintza lantzeko talde txiki bat eskainiko dizu eta horrela, zuk nahiago duzun erritmoan egingo duzu aurrera.

BOGA ariketa multzo bat baino askoz gehiago da. Elkarrizketetan oinarritzen den metodo honek istoriotxoak jorratzen ditu eta hauek dira gramatika lantzeko abiapuntua. Errepaso ariketak, esamoldeak, ariketak... Dena dago barne.

Ez utzi biharko. Informatu zaitez Eibarko Udal Euskaltegian!!!